كلام ذو حـــدين
كلمة من الشرق
على كلمتين من الغرب
نفضل نخبط فى حياتنا
لحد مانرسى على درب
وان ماريسناش مابننساش
نرجع نخبط من تانى
واهى كلمة يمين وكلمة شمال
جملة حرام وكلمة حلال
امبارح كنا عيال
والنهارده كبرنا وكل واحد فينا ملزوم بسؤال
عموما وفى كل الأحوال
مش هنجاوب لأننا تايهين
الدنيا مرجحتنا فى ملاهى النصابين
ونزلنا من المرجيحه زى المتكسحين
صحيح بنعرف نمشى
لكن هنمشى ازاى واحنا يابلدى ضايعين
مهما كبرنا ياهبة النيل
لسه فى أرضك صغيرين
مهما علينا وصلنا لفوق
لسه فى أرضك مش ظاهرين
طب ايه السر
يمكن فينا العيب يمكن نكون مجانين
يمكن نكون من جنس تانى غير البنى آدمين
مش عارف والله يامصر
رغم انى لما بسافر بفرح
لكن برجع ويملانى الحنين
ماهو زى مافيكى أبلسه
وزى مافيكى بلطجيه ونصابين
فيكى شوية ناس طيبين
فيكى الأصاله مختفتش
بس النداله خدت نصيب الأسد
وكتروا فيكى الخاينين
ياتريحينا يامصر
وتعيشينا فى قصر
يااما نفضل متغربين
أنا عن نفسى بقول نفضل متغربين
ده خير بلدنا منه محرومين
وبنات بلدنا الحلوين
ان ماتربوش بجد
وكنا عليهم غافلين
هنبص فى يوم نلاقيهم ضايعين
ومسلمين بلدنا وغير المسلمين
نازلين فى بعض خناق
مع انهم عارفين
ان النهايه بتجمعهم
فى ظل كلمة مصريين
تعبان أنا وحزين
لكن هاشكى لمين
مافى غيره رب الكون
عارف مين الغلابه ومين النصابين
عارف مين اللى ايدهم طالت ومين المحرومين
وكل شئ بايده
واحنا لأمره مسلمين
وبندعى نقول يارب تهلك الظالمين
يارب تهلك الظالمين
------------------------------
أحمدالعرينى