شوية ناس متجمعين
وسط الميدان
بيدوروا على حلم ضاع
اسمه الحنان
بيدوروا ع الود وع المحبه
وحشهم طعم الأمان
بس ازاى هييجى الأمان
والحرامية ملوا البلدان
ازاى
ازاى هييجى وسط ناس
خايفه تقول رأيها
ازاى هييجى وسط ناس
خايفه تعبر عن حبها
ناس غلابه وطيبين
وكمان حكما وعارفين
ان بلدنا حلوة لكنها
مش عاوزة تضم أهلها
دا أهلك هما عونك يابلد
تسوى ايه من غير البنت والولد
تسوى ايه من غير مهندس وطبيب
ووقت لما تتعبى
بيكون حبيبك قريب
يفضل فى حضنك يابلد
من يوم ماعينه تفتح لحد ماشعره يشيب
جرالك ايه يابلد
الزمان بيمر وكل مايمر بتأسى علينا
مع اننا جايين لك علشان تضمينا
سبنا بره وعز بره
وفى أول طياره جينا
افتكرنا انك هتفتحى دراعك وتاخدينا
وتاخدينا فى حضنك
لسه حضنك بين ايديكى يابلد
ولا بدلتيه بأيامنا الحزينه
والخيانه والنداله
بقت فى جوفك بدل الناس الأمينه
ياريتنا ماسبنا بره وعز بره
ياريتنا ماجينا
عارفه يابلدى
كل الناس فى بلادهم محترمين
عايشين حياتهم بره وجوه متقدرين
لاعمرهم قالوا اتهننا
ولا يوم سمعنا منهم صوت حزين
ولا يوم وقفوا فى طابور
ولا يوم حسوا الأنين
ولا يوم وقفوا على الشارع مستنيين
اتوبيس يعدى وآخرتها مابيعديش
وصاحب يستنوا فيه آخرتها مايجيش
يقولوا ليه مايجيش
يقولوا فى السجن السياسى
قال ايه حماسى
كل ده ماشفناهوش فى بلاد غريبه
لكن هنا
افعالنا بقت عجيبه
نسينا معنى الطيبه
وكمان من ضمن الخيبه
متهانين جوه وبره
عاوزين نحس ولو مره
ان بلدنا ليها قيمه
لكنى بحلم وحلمى هيبقى فيلم
وهيتسمع فى السيما
لكن عمره مايشوف النور
هو احنا نسينا السور؟؟؟
السور اللى مابيننا وبين أحلامنا
اللى لو يوم اتهد
راح تتهد معاه الدور
والأرض الخضرا هتبقى بور
وكمان لو اتهد السور
ابنى واخويه هينجح وهيعلى
وهيعبر الجسور
وده طبعا راح يزعل ناس كتير
ناس عاوزانا نفضل جهله
وآخرنا نعرف شكل الجرجير
خلاص خربتى يابلد
وابن الفواعلى اللى فى جنينة البيه
صبح وزير
وعم عبده الغفير
بقى هو تانى راجل فى البلد دى
بقى الأمير
أماا احنا
نروح ندور ع القبور
لأن دى فى النهايه هتبقى الدور
أما الدنيا ببلاويها تغور
وآخر الكلام أحلى سلام
سلملى ع البيه المأمور